大磡森  Tai Hom Sham

日期： 2017-11-25
天氣： 天陰，能見度低。
相機： Panasonic LX7, Samsung Galaxy S7

日記：半年前䓫萊開線大磡森西脊，無緣。今日優悠再開，太早，唯有下晝玩追踪。由二澳上西脊，無驚無險亦無景（今日何處不是？），3點幾到頂，有時間就當然要逛逛。走向北面，見有條殘殘地的絲帶，跟住就再無。打量北脊，草木短到只及膝，可能早幾年燒光，雖沒路胚，但值博率高，唔掂最多折返，Gogogo！

落到最後一個山頭，開始有番隱約路胚，過埋山頂再向萬丈峽谷落，不久見到條比較新的尼龍草標，路亦變得明顯。去到個分岔位，揀右邊，落到個見到瀑布的觀景位就密晒，唯有回頭揀左邊條路，果是正路，少少崎嶇抓樹的一般澗旁路，一落就是水壩。

其實全程都唔難，亦唔算密，特別是下坡可踩住灌木落。只奇怪差不多全程都無標無路胚，浪費了好好的一條線。當今行山界最不好的風氣就是一窩蜂，一是没人行，一是個個開。